Курс 1: «Марсіянскі сыгнал: Касьмічная місія сям’і Альторн»

Сардэчна запрашаем на аўтарскі курс — касьмічную прыгоду разам зь сям’ёй Альторнаў, прышэльцаў з Проксымы Цэнтаўра. Разам з Альторнамі ўдзельнікі і ўдзельніцы будуць праходзіць місіі, дзе Альторн, капітан карабля, і Ліранія, галоўны інжынэр, выпраўляюцца на Зямлю зь дзецьмі Зорынам і Мэліяй. Праз нечаканую памылку штучнага інтэлекту падарожжа заканчваецца катастрофай на Марсе.

Місія складаецца з 12 частак, навучыць асновам працы з Arduino і дапаможа прышэльцам выжыць на гэтай загадкавай плянэце.

Тэмы місіяў:

• Шыротна-імпульсная мадуляцыя (ШІМ): кіраваньне яркасьцю сьвятлодыёдаў.

• Асновы электронікі: праца з рэзыстарамі і макетнымі платамі.

• Сьветлавыя эфэкты: вывучэньне аднаколерных і RGB сьвятлодыёдаў.

• Гукавыя сыгналы: выкарыстаньне п’еза-дынаміка.

• Кіраваньне асьвятленьнем: праца з датчыкамі сьвятла і патэнцыя мэтрамі.

• Робататэхніка: праграмаваньне сэрвапрывадаў для руху і маніпуляцыяў.

• Інтэрфэйсы карыстальніка: стварэньне сыстэмаў зь сямісэгмэнтнымі індыкатарамі, матрычнымі клявіятурамі і джойстыкамі.

Кожны ўрок напоўнены практычнымі заданьнямі, якія дапамогуць паглыбіць веды і ствараць уласныя праекты. Разам з Зорынам і Мэліяй вы навучыцеся выкарыстоўваць зямныя тэхналёгіі для сувязі з плянэтай і распрацуеце ратавальную місію, каб вярнуцца дадому. Альторны заклікаюць далучыцца да гэтай захапляльнай прыгоды, якая навучыць ня толькі тэхнічным навыкам, але і супрацы ды крэатыўнаму мысьленьню ў крытычных сытуацыях.

А цяпер пазнаёмцеся з пэрсанажамі нашай гісторыі:

Бацькі

Альторн — бацька, капітан карабля. Рашучы, валодае велізарным досьведам у касьмічных палётах і стратэгічным плянаваньні.

Ліранія — маці, галоўны інжынэр. Майстравітая спэцыялістка ў тэхналёгіях і мэханіцы, здольная вырашыць любую тэхнічную праблему дзякуючы сваёй вынаходлівасьці і ведам.

Дзеці

Зорын — сын, 12 гадоў. Дапытлівы і сьмелы хлопчык, які марыць стаць пілётам, як ягоны бацька. Абажае вывучаць зорнае неба і разбірацца ў навігацыйных мапах.

Мэлія — дачка, 10 гадоў. Творчая і энэргічная дзяўчынка з вострым розумам і любоўю да навукі. Яна дапамагае маці ў інжынэрных задачах і часта знаходзіць нестандартныя рашэньні для складаных праблемаў.